មន្ត្រីជំនាញមន្ទីរសាធារណការសហការជាមួយស្នងការដ្ឋាននគរបាលខេត្តចុះណែនាំក្រុមអ្នកបើកបររថយន្តដឹកដីឲ្យបង្វែរទិសធ្វើចរាចរណ៍តាមដែលរដ្ឋបាលខេត្តបានកំណត់
ខេត្តកែប ៖ មន្ត្រីជំនាញនៃមន្ទីរសាធារណការ និងដឹកជញ្ជូន សហការជាមួយស្នងការដ្ឋាននគរបាលខេត្ត នៅថ្ងៃពុធ ៥រោច ខែកក្តិកឆ្នាំឆ្លូវ ត្រីស័ក ពុទ្ធសករាជ ២៥៦៥ បានចុះធ្វើការណែនាំដល់ក្រុមអ្នកបើកបររថយន្តបែនដឹកដីភ្លៅបួន (រថយន្តយីឌុប) និងរថយន្តបែនដឹកដីភ្លៅពីរ(ទម្ងន់០៥តោន) ចំនួន ៧០គ្រឿងនៅចំណុចទីតាំងរណ្តៅដីទីលានចាក់សំរាម ស្ថិតក្នុងក្រុងកែប ខេត្តកែប ដោយណែនាំអោយបើកបរតាមគន្លងផ្លូវដែល រដ្ធបាលខេត្តបានកំណត់ និងកុំបើកបរហួសល្បឿនច្បាប់កំណត់នៅក្នុងក្រុង និងទីប្រជុំជន(40Km/h) ពិសេសមិនត្រូវផ្ទុកលើសទម្ងន់កម្រិតកំណត់តាមមាត្រា ២៦ នៃច្បាប់ផ្លូវថ្នល់ឡើយ។
សូមបញ្ជាក់ថា ការចុះណែនាំនេះបន្ទាប់ពី រដ្ធបាលខេត្តកែប បានចេញសេចក្តីជូនដំណឹងកាលពីថ្ងៃចន្ទ ៣រោច ខែកក្តិក ឆ្នាំឆ្លូវ ត្រីស័កពុទ្ធសករាជ ២៥៦៥ ត្រូវនឹងថ្ងៃទី២២ ខែវិច្ឆិកា ឆ្នាំ២០២១ ស្តីពី “ការបង្វែរទិសធ្វើចរាចរណ៍ ចំពោះយានយន្តគ្រប់ប្រភេទធ្វើដំណើរឆ្លងកាត់ចំណុច គីឡូម៉ែត្រ ០០+០០០ ដល់គីឡូម៉ែត្រ ០៦+០០០ ទិសចូលពីរង្វង់មូលសេះស ដល់រង្វង់មូលព្រះវិស្ណុការនៅលើផ្លូវជាតិលេខ ៣៣A ស្ថិតក្នុងក្រុងកែប ខេត្តកែប៕
