(សៀមរាប)៖ សិស្សក្រីក្រស្ថិតនៅសាលាបឋមសិក្សា ហ៊ុន សែន គោកតាចាន់ ក្នុងសង្កាត់គោកចក ក្រុងសៀមរាបជាង១០០នាក់ ទទួលបានអំណោយសម្ភារៈសិក្សាពីអង្គការអង្គការមូលនិធិថែទាំសុខភាពអេដស៍ ហៅកាត់ថា AHF ដើម្បីអបអរទិវាជំងឺអេដស៍ពិភពលោកឆ្នាំ២០២១។

លោកវេជ្ជបណ្ឌិត ឈឹម សារ៉ាត់ នាយកការិយាល័យប្រចាំតំបន់អាស៉ីនៃអង្គការ AHF បានលើកឡើងក្នុងពេលប្រគល់អំណោយកាលពីថ្ងៃទី០២ ខែធ្នូ ឆ្នាំ២០២១ថា អង្គការរៀបចំព្រឹត្តិការណ៍ចម្រុះផ្សេងៗ ទាំងនៅតាមកន្លែងផ្ទាល់ និងតាមប្រព័ន្ធអនឡាញ នៅក្នុងបណ្តាប្រទេសជាសមាជិកចំនួន៤៥ប្រទេស ក្នុងគោលបំណងបង្វែរចំណាប់អារម្មណ៍របស់ជាតិ និងអន្តរជាតិ ឱ្យងាកទៅរកវិបត្តិជំងឺអេដស៍ ក៏ដូចជាអ្នកផ្ទុក និងអ្នករងការប៉ះពាល់ដោយសារតែជំងឺនេះ នៅទូទាំងសកលលោក។ ជាក់ស្ដែងការចែកសម្ភារៈសិក្សាដល់សិស្សានុសិស្សនាពេលនេះ ក៏ជាសារផ្ញើដល់ពួកគាត់ ដើម្បីឱ្យបានយល់ដឹងពីខ្លះៗពីបញ្ហាជំងឺអេដស៍ និងមេរោគអេដស៍ ដើម្បីក្រើនរំលឹក អំពីសារសំខាន់នៃឱកាសទទួលបានការធ្វើតេស្ត ការបង្ការ និងការព្យាបាលជំងឺអេដស៍។

លោកវេជ្ជបណ្ឌិតបានបន្តទៀតថា នៅពេលដែលប្រទេសកម្ពុជា កំពុងប្រឈមនឹងជំងឺកូវីដ-១៩នេះ អ្នករស់នៅជាមួយមេរោគអេដស៍ និងក្រុមគ្រួសារ ដែលកំពុងរងផលប៉ះពាល់ដោយមេរោគអេដស៍ និងការរាតត្បាតដោយមេរោគកូវីដ-១៩នេះ បានធ្វើឲ្យពួកគាត់មានការលំបាកកាន់តែខ្លាំង ហើយអង្គការមូលនិធិថែទាំសុខភាពអ្នកជំងឺអេដស៍ (AHF)តែងតែយកចិត្ដទុកដាក់យ៉ាងខ្លាំង ក្នុងអំឡុងពេលជីវភាពជួបការខ្វះខាត ដូចជាសិស្សានុសិស្សជាង១០០នាក់នៅសាលាបឋមសិក្សាហ៊ុន សែន គោកតាចាន់នេះ។

បន្ថែមលើសពីនោះ រាជរដ្ឋាភិបាល ក្រសួងសុខាភិបាលមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ (NCHADS) ក៏បានយកចិត្តទុកដាក់ និងប្រឹងប្រែង ធ្វើយ៉ាងណាឲ្យពួកគាត់ទទួលបានការព្យាបាល និងជំនួយឧបត្ថម្ភជួយដោះស្រាយក្នុងខណៈដ៏តានតឹងនេះផងដែរ។ បើតាមស្ថិតិថ្មីៗចុងក្រោយគេរបស់អង្គការ UNAIDS បានប៉ាន់ប្រមាណថា មានមនុស្សប្រមាណជា៣៨លាននាក់ជុំវិញពិភពលោក បាននឹងកំពុងរស់នៅជាមួយជំងឺអេដស៍ ខណៈនៅឆ្នាំ២០២០កន្លងមកនេះ មានមនុស្សតែជាង១.៥លាននាក់តែប៉ុណ្ណោះ បានឆ្លងជំងឺនេះ។

សម្ភារៈសិក្សាដែលចែកនាពេលនេះរួមមាន កាបូបដាក់សម្ភារៈសិក្សាម្នាក់មួយ សៀវភៅ ខ្មៅដៃ ប៊ិច និងសម្ភារៈសម្រាប់រៀនជាច្រើនទៀត ហើយការចែកសម្ភារៈនេះ ក្នុងគោលបំណងអបអរទិវាពិភពលោកប្រយុទ្ធប្រឆាំងជំងឺអេដស៍និងជំងឺឆ្លងដដៃទៀតផងដែរ។

សូមបញ្ជាក់ថា អង្គការមូលនិធិថែទាំសុខភាពអ្នកជំងឺអេដស៍ (AHF) ជាអង្គការប្រយុទ្ធនឹងជំងឺអេដស៍ធំជាងគេ ដែលមាននៅទូទាំងប្រទេសចំនួន៤៥។ នៅប្រទេសកម្ពុជា ក៏មានកិច្ចសហការជាដៃគូជាមួយរាជរដ្ឋាភិបាល ក្នុងការផ្តល់សេវាព្យាបាល ថែទាំដល់អ្នករស់នៅជាមួយមេរោគអេដស៍ចំនួន៣៨ទីតាំង ដែលកំពុងផ្តល់ឱសថប្រឆាំងមេរោគអេដស៍ដល់អតិថិជនចំនួនជាងបួនម៉ឺននាក់ និងមានគម្រោងបង្ការមេរោគអេដស៍ តេស្តឈាមចល័តនៅតាមខេត្តក្រុងនៅក្នុងប្រទេសកម្ពុជាផងដែរ៕