ឯកឧត្តម វ៉ា ថន អញ្ជើញនាំយកអំណោយចែក ជូនបងប្អូនកំពុងធ្វើចត្តាឡីស័កនៅស្រុកស្នួល
ខេត្តក្រចេះ ៖ ឯកឧត្តម វ៉ា ថន អភិបាលខេត្តក្រចេះ នាព្រឹកថ្ងៃសុក្រ ៥កើត ខែពិសាខ ឆ្នាំឆ្លូវ ទោស័ក ព.ស ២៥៦៤ ត្រូវនឹងថ្ងៃទី១៦ ខែមេសា ឆ្នាំ២០២១នេះ នាំយកអំណោយចែកជូនបងប្អូនកំពុងធ្វើចត្តាឡីស័ក នៅមណ្ឌលចត្តាឡីស័ក វិទ្យាល័យហ៊ុនសែនស្នួល និងមន្ទីរពេទ្យបង្អែកស្រុកស្នួល ស្ថិតនៅក្នុងស្រុកស្នួល ខេត្តក្រចេះ។ ពិធីនេះមានការចូលរួមពីឯកឧត្តមអភិបាលរងខេត្ត ស្នងការនគរបាលខេត្ត មេបញ្ជាការរងកងរាជអាវុធហត្ថ អភិបាលស្រុក និងលោកគ្រូ អ្នកគ្រូពេទ្យប្រចាំការនៅមណ្ឌលចត្តាឡីស័ក។
អំណោយដែលបាននាំយកទៅប្រគល់ជូនបងប្អូនកំពុងធ្វើចត្តាឡីស័កចំនួន៥៥នាក់ ក្នុងម្នាក់ៗទទួលបាន មី១កេស ទឹកសុទ្ធ ១កេស និងថវិកា៥ម៉ឺនរៀល ចំពោះបងប្អូនដែលមានផ្ទុកវីរុសកូវីដ១៩ ចំនួន៣នាក់ ទទួលបាន មី១កេស ទឹកសុទ្ធ១កេស កំសៀវទឹក១ ផ្លែឈើ១ កន្ត្រក និងថវិកា១០ម៉ឺនរៀល ព្រមទាំងឧបត្ថម្ភអាល់កុល ម៉ាស់ ជូនមន្ទីរពេទ្យបង្អែកស្រុក សម្រាប់ប្រើប្រាស់ក្នុងអំឡុងធ្វើចត្តាឡីស័កផងដែរ៕
