ខេត្តក្រចេះ ៖ ឯកឧត្តម ព្រុំ សុខា រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលកម្ពុជាចុះជួយមូលដ្ឋានខេត្តក្រចេះ នាព្រឹកថ្ងៃសៅរ៍ ៣កើត ខែបឋមាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១២ ខែមិថុនា ឆ្នាំ២០២១នេះ បានអញ្ជើញសំណេះសំណាល និងសួរសុខទុក្ខ និងនាំយកអំណោយចែកជូនបងប្អូនប្រជាពលរដ្ឋនៅឃុំដំរីផុង ស្រុកឆ្លូង ខេត្តក្រចេះមានការខ្វះខាត។

ពិធីនេះក៏មានការអញ្ជើញចូលរួមពីសំណាក់ឯកឧត្តម វ៉ា ថន អភិបាល នៃគណៈអភិបាលខេត្តក្រចេះ ឯកឧត្តម លោកជំទាវអភិបាលរងខេត្ត លោកប្រធាន អនុប្រធានមន្ទីរជុំវិញខេត្ត លោក អភិបាល អភិបាលរងស្រុក កងកម្លាំងទាំងបីប្រភេទ ព្រមទាំងអាជ្ញាធរដែនដី រួមនិងប្រជាពលរដ្ឋជាច្រីនរយគ្រួសារផងដែរ។

ក្នុងពិធីចែកអំណោយនេះផងដែរ លោក ហេង ស៊ីថា អភិបាលស្រុកឆ្លូងបានឡើងធ្វើគារវកិច្ចចំពោះឯកឧត្តមព្រមទាំងគណៈប្រតិភូ និងអង្គពិធីទាំងមូលនូវរបាយការណ៍សង្ខេប និងសភាពការណ៍រួមនៅក្នុងស្រុកគឺមានលក្ខណៈល្អប្រសើរ។

ទាក់ទងនឹងបញ្ហាជីវភាព លោកអភិបាលស្រុកបានលើកឡើងថា ដោយសារមានរលកវិបត្តិមេរោគរាតត្បាតជាសកលនៃជំងឺកូវីដ-១៩ ដែលកំពុងគំរាមកំហែងនូវអាយុជីវិតមនុស្ស នៅទូទាំងសកលលោកនាពេលបច្ចុប្បន្នដែលមិនទាន់បានស្រាកស្រាននៅឡើយរួមទាំងកម្ពុជាយើងផងដែរនោះ ធ្វើឲ្យជីវភាពប្រជាពលរដ្ឋជួបការលំបាក។

ក្នុងឱកាសនោះដែរ ឯកឧត្តមរដ្ឋមន្រ្តីមានប្រសាសន៍ថា ឯកឧត្តមអញ្ជើញមកពេលនេះ ពិសេសចង់ដឹងការរស់នៅរបស់បងប្អូនយើង និងក្តាប់ឲ្យបាននូវរាល់សំណូមពររបស់ប្រជាពលរដ្ឋនៅគ្រប់មូលដ្ឋាន និងក្នុងសហគមន៍ ដើម្បីជួបដោះស្រាយនូវបញ្ហាប្រឈម និងជួយជំរុញការអភិវឌ្ឍនៅមូលដ្ឋានប្រកបដោយចេរភាព។

ជាមួយគ្នានេះ ឯកឧត្តមរដ្ឋមន្រ្តី និងជាប្រធានក្រុមការងាររាជរដ្ឋាភិបាលកម្ពុជាចុះជួយមូលដ្ឋានខេត្តក្រចេះក៏បានដាស់តឿនផងដែរថា យើងមិនត្រូវភ្លេចខ្លួននោះទេ ពីជំងឺដ៏កាចសាហាវមួយនេះ ដូច្នេះត្រូវចូលរួមអនុវត្តន៍ឲ្យបានហ្មត់ចត់បំផុតនូវវិធានរបស់រាជរដ្ឋាភិបាល និងវិធានការក្រសួងសុខាភិបាលនូវ «៣ការពារ និង៣កុំ» និងវិធានផ្សេងៗទៀតដែលបានដាក់ចេញសម្រាប់អនុវត្តន៍ ដើម្បីបញ្ជៀសនៃការឆ្លងរីករាលចូលក្នុងសហគមន៍សាជាថ្មី៕