រាជរដ្ឋាភិបាលផ្អាកជ្រើសរើសក្របខណ្ឌមន្ដ្រីបម្រើនៅគ្រប់ក្រសួង លើកលែងតែក្រសួងសុខាភិបាល
ភ្នំពេញ ៖ រាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ បានសម្រេចផ្អាកជ្រើសរើសក្របខណ្ឌមន្ដ្រីថ្មីគ្រប់ក្រសួងស្ថាប័ន រួមទាំងគ្រូបង្រៀន កម្លាំងប្រដាប់អាវុធ និងរដ្ឋបាលថ្នាក់ក្រោមជាតិ លើកលែងតែក្រសួងសុខាភិបាលសម្រាប់ឆ្នាំ២០២២ ។
ការសម្រេចផ្អាកជ្រើសរើសក្របខណ្ឌមន្ត្រីថ្មីសម្រាប់ឆ្នាំ២០២២ ត្រូវបានក្រសួងសេដ្ឋកិច្ច និងហិរញ្ញវត្ថុ ចេញប្រកាសតាមរយៈសេចក្ដីផ្ញើទៅរដ្ឋមន្ត្រីមុខងារសាធារណៈ នៅថ្ងៃទី១៧ ខែសីហា ឆ្នាំ២០២១ ដោយបញ្ជាក់ថា ការលើកលែងចំពោះក្រសួងសុខាភិបាលនេះ ដោយសារបច្ចុប្បន្នកម្ពុជាស្ថិតក្នុងបរិបទកូវីដ-១៩ ។
ក្រសួងសេដ្ឋកិច្ច និងហិរញ្ញវត្ថុ បញ្ជាក់បន្ថែមថា ៖ «បច្ចុប្បន្នកម្ពុជាស្ថិតក្នុងបរិបទកូវីដ-១៩ ទើបត្រូវការជ្រើសរើសនិស្សិតបញ្ចប់ការសិក្សាផ្នែកសុខាភិបាលមកបម្រើការលើផ្នែកនេះ ខណៈកម្ពុជាត្រូវការគ្រូពេទ្យជាច្រើនរូបទៀត ដើម្បីបំពេញតម្រូវលើការផ្តល់សេវាសុខាភិបាលឱ្យពលរដ្ឋ ជួបបញ្ហាសុខភាព ដោយសារជំងឺកូវីដ» ៕
