ភ្នំពេញ ៖ ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានថ្លែងកោតសរសើរដល់កងកម្លាំងដែលបានពេញភារកិច្ចជូនជាតិ ជូនអង្គភាព ជាពិសេសបម្រើប្រជាពលរដ្ឋ ទាំងយប់ទាំងថ្ងៃដោយមិនខ្លាចនឿយហត់ ដូចជាការល្បាតដើម្បីរក្សាសន្តិសុខ សុវត្ថិភាពជូនប្រជាពលរដ្ឋ ការការពារប្រតិភូជាតិ អន្តរជាតិ ជាពិសេសការអនុវត្តបម្រាមគោចរនៅពេលយប់រយៈពេល១៤ថ្ងៃ ចាប់ពីថ្ងៃទី២៩ ខែកក្កដា រហូតដល់ ថ្ងៃទី១២ ខែសីហា ឆ្នាំ២០២១ ចាប់ពីម៉ោង ៩ ៖ ០០នាទីយប់ ដល់ម៉ោង ៣ ៖ ០០នាទីទៀបភ្លឺ ក៏ដូចជាការខិតខំបម្រើសេវាជូនប្រជាពលរដ្ឋបានយ៉ាងល្អប្រសើរ ។

ទន្ទឹមនេះ ឧត្តមសេនីយ៍ឯក ស ថេត ក៏បានណែនាំដល់ប្រធានអង្គភាពត្រូវតែយកចិត្តតាមដានសុខភាពរបស់មន្ត្រីក្រោមឱវាទជាប្រចាំ ហើយមន្ត្រីទាំងអស់ត្រូវកាត់សក់ខ្លីជានិច្ច ស្លៀកពាក់ឯកសណ្ឋានឲ្យបានត្រឹមត្រូវ និងត្រូវបម្រើសេវាទូទៅជូនប្រជាពលរដ្ឋឲ្យបានល្អ ហើយលោក លោកស្រីស្នងការរងទទួលដឹកនាំតាមបណ្តាខណ្ឌនីមួយៗ លោកអធិការខណ្ឌទាំង១៤ និងលោកនាយប៉ុស្តិ៍ទាំងអស់ត្រូវតែយកចិត្តទុកដាក់តាមដានព័ត៌មាន និងត្រូវតែឆ្លើយតបដោះស្រាយបញ្ហាប្រឈម និងចាត់វិធានការជូនប្រជាពលរដ្ឋឲ្យបានឆាប់រហ័សបំផុត ២៤/២៤ម៉ ជាពិសេសត្រូវលើកទូរស័ព្ទរបស់ប្រជាពលរដ្ឋគ្រប់ពេលវេលា។

ឧត្តមសេនីយ៍ ស ថេត បញ្ជាក់បន្ថែមថា បើមន្ត្រីរូបណាមិនលើកទូរស័ព្ទប្រជាពលរដ្ឋ សូមទាក់ទងមក ឯកឧត្តមផ្ទាល់តាមរយៈលេខទូរស័ព្ទ 012 203 777 និងក្រុមការងារព័ត៌មានប្រតិកម្មរហ័ស តាមរយៈលេខទូរស័ព្ទ 069 516 999។

ការថ្លែងដូច្នេះក្នុងឱកាសដែល ឯកឧត្តម ឧត្តមសេនីយ៍ឯកស្នងការ អញ្ជើញចូលរួមដឹកនាំកិច្ចប្រជុំប្រចាំ ខែកក្កដា និងលើកទិសដៅការងារសម្រាប់ ខែសីហា ព្រឹកថ្ងៃទី០២ ខែកក្កដា ឆ្នាំ២០២១ ដែលកិច្ចប្រជុំនេះមានការចូលរួមពី លោក-លោកស្រី ជាស្នងការរង នាយការិយាល័យជំនាញ លោកអធិការនគរបាលខណ្ឌទាំង១៤ រួមនិងមន្ត្រីពាក់ព័ន្ធមួយចំនួនទៀត៕