កាកបាទក្រហមកម្ពុជា និងស.ស.យ.កខេត្តចូលរួមរំលែកទុក្ខគ្រួសារសពស្ត្រីម្នាក់ទទួលមរណភាព ក្រោយសម្រាលបុត្របាន៥ថ្ងៃ
ខេត្តមណ្ឌលគិរី ៖ ដោយមានការយកចិត្តទុកដាក់ពីថ្នាក់ដឹកនាំខេត្តមណ្ឌលគិរី នារសៀលថ្ងៃទី២៤ ខែមីនា ឆ្នាំ២០២២ សាខាកាកបាទក្រហមកម្ពុជា ខេត្តមណ្ឌលគិរី និងសហភាពសហព័ន្ធយុវជនកម្ពុជា ដឹកនាំដោយ លោក អាន សុឃីម នាយកសាខា លោក ណយ ច័ន្ទតារា អនុប្រធានស.ស.យ.កខេត្ត និងជាប្រធានក្រុមការងារចុះពង្រឹងស្រុកកែវសីមា និងលោក ហឿន សុខណា ប្រធានប្រតិបត្តិស.ស.យ.ក ស្រុក និងសហការី បានចូលរួមរំលែកទុក្ខយ៉ាងក្រៀមក្រំចំពោះក្រុមគ្រួសារសពលោក ជួន សុភ័ណ្ឌ អាយុ ២៨ឆ្នាំ ដែលភរិយា របស់លោក ឈ្មោះ ខៀវ សុខនៅ បានទទួលមរណភាព កាលពីថ្ងៃទី២៣ ខែមីនាឆ្នាំ២០២២ ក្នុងជន្មាយុ ១៨ឆ្នាំ ជាប្រជាពលរដ្ឋក្រីក្រ ក្រោយពីសម្រាលកូន បាន៥ថ្ងៃ រស់នៅក្នុងភូមិត្រពាំងផ្អេរ ឃុំស្រែខ្ទុម ស្រុកកែវសីមា ខេត្តមណ្ឌលគិរី។
លោក អាន សុឃីម នាយកសាខា បានចូលរួមរំលែកទុក្ខដ៏ក្រៀមក្រំពីសំណាក់ឯកឧត្តម ថង សាវុន ប្រធានគណៈកម្មាធិការសាខាកាកបាទក្រហមកម្ពុជា ខេត្តមណ្ឌលគិរី ចូលរួមសម្ដែងការសោកស្ដាយចំពោះការបាត់បង់មនុស្សជាទីស្រឡាញ់ ក្នុងគ្រួសារ និងសូមឧទ្ទិសកុសលដល់វិញ្ញាណក្ខន្ធនៃសព បានទៅកាន់សុគតិភព កុំបីឃ្លៀងឃ្លាតឡើយ។
សម្ភារចូលបុណ្យរួមមាន ៖ សហភាពសហព័ន្ធយុវជនកម្ពុជាខេត្ត សរុប ១.០៧០.០០០រៀល និងសាខាកាកបាទក្រហមកម្ពុជា ខេត្តមណ្ឌលគិរី រួមមាន ៖ អង្ករ ២០គីឡូក្រាម ត្រីខ ១០កំប៉ុង មី ១កេស ទឹកដោះគោឆៅ ៣យួរ ទឹកដោះគោក្រដាស ២យួរ ក្រមា១ សារុង១ ភួយ១ សាប៊ូលាងដៃ២ដុំ ម៉ាស់៣ ឃីតទារក១ឈុត និងថវិកាចំនួន ២៥០,០០០រៀល៕
