អាស៊ានប៉ារ៉ាហ្គេម៖ ក្រុមបាល់បោះជិះរទេះនារីកម្ពុជា ប៉ះថៃម្តងទៀត ដើម្បីដណ្ដើមមេដាយមាស នាព្រឹកនេះ
ភ្នំពេញ៖ ក្រុមបាល់បោះជិះរទេះជនពិការនារីជម្រើសជាតិកម្ពុជា បានឡើងវគ្គផ្ដាច់ព្រ័ត្រហើយ ក្រោយយកឈ្នះក្រុមបាល់បោះជិះរទេះឡាវ ដោយលទ្ធផល ១៦-១ពិន្ទុ នៃព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ក្នុងការប្រកួតបញ្ចប់វគ្គសន្សំពិន្ទុ លើវិញ្ញាសា (៣នាក់ ទល់ ៣នាក់) នៅល្ងាចថ្ងៃទី០២ ខែមិថុនា ឆ្នាំ២០២៣ នៅពហុកីឡដ្ឋានជាតិមរតកតេជោ។
ជ័យជម្នះនេះបានធ្វើឲ្យក្រុមការពារមេដាយមាសកម្ពុជា ឡើងវគ្គផ្ដាច់ព្រ័ត្រ ដោយត្រូវជួបក្រុមថៃ នាព្រឹកថ្ងៃទី០៣ ខែមិថុនានេះ ដើម្បីដណ្ដើមមេដាយមាស។ ក្រុមទាំងពីរនេះ បានជួបគ្នាក្នុងវគ្គសន្សំពិន្ទុម្ដងហើយ ដោយថៃ ឈ្នះកម្ពុជា ១០-៧ពិន្ទុ៕
