ក្រសួងរៀបចំយុទ្ធនាការគាំទ្រការអប់រំឌីជីថលសម្រាប់សិស្សថ្នាក់ទី១០ ដល់ ១២ នៅភ្នំពេញ
ភ្នំពេញ៖ ក្រសួងអប់រំ យុវជន និងកីឡា បានប្រកាសរៀបចំយុទ្ធនាការគាំទ្រការអប់រំឌីជីថលសម្រាប់សិស្សានុសិស្សនៅគ្រឹះស្ថានមធ្យមសិក្សារាជធានីភ្នំពេញ ដែលនឹងប្រព្រឹត្តទៅនៅក្នុងខែកក្កដា ឆ្នាំ២០២៣នេះ នៅគ្រប់វិទ្យាល័យរដ្ឋទាំងអស់នៅរាជធានីភ្នំពេញ។
តាមរយៈយុទ្ធនាការនេះ គឺផ្តល់ការបណ្តុះបណ្តាលនៅតាមថ្នាក់រៀននីមួយៗដោយផ្ទាល់ លើប្រធានបទចំនួន៦ ដូចជា៖ ១. ការស្វែងយល់ពីវិធីសាស្រ្តរៀន, ២. ការរៀនដោយស៊ីជម្រៅ, ៣. ការរៀនតាមបែបពន្លឿន, ៤. ការបង្កើតក្លឹបសិក្សាសម្រាប់សិស្សរៀនយឺត ឬក្លឹបសិក្សាមុខវិជ្ជា, ៥. ការបំប៉នសមត្ថភាពត្រៀមប្រឡងសញ្ញាបត្រមធ្យមសិក្សាទុតិយភូមិ និង ៦. ការប្រើប្រាស់កម្មវិធីទូរសព្ទដៃ Duraseksa – ទូរសិក្សា។
ក្រសួងបញ្ជាក់ថា យុទ្ធនាការនេះ នឹងត្រូវអនុវត្តនៅតាមគ្រឹះស្ថានមធ្យមសិក្សារដ្ឋចំនួន ៣៨ នៅក្នុងរាជធានីភ្នំពេញ ហើយសិស្សានុសិស្សជាង ៤០ពាន់នាក់ ដែលកំពុងសិក្សានៅកម្រិតមធ្យមសិក្សាទុតិយភូមិ និងទទួលការបណ្តុះបណ្តាលដោយគរុនិស្សិត និងគរុសិស្សស្ម័គ្រចិត្តចំនួន ៣៦៧នាក់ ហើយដែលត្រូវចុះផ្ទាល់ទៅកាន់ថ្នាក់រៀនជិត ១០០០បន្ទប់៕
